Que é o Ingreso Mínimo Vital ( IMV)?
O Ingreso Mínimo Vital é unha prestación dirixida a previr o risco de pobreza e exclusión social das persoas que viven soas ou están integradas nunha unidade de convivencia e carecen de recursos económicos básicos para cubrir as súas necesidades básicas.
Os requisitos para recibir o IMV son os seguintes:
- Ter máis de 23 anos e menos de 65 anos, ou 18 se hai menores a cargo.
- Cumprir un ano de residencia legal en España.
- Vivir independentemente polo menos 1 ano en caso de familias e 3 anos en caso de persoas soas.
- No caso de unidades de convivencia, formarse polo menos 1 ano antes da solicitude.
- Solicitar previamente as prestacións ás que se puidese ter dereito.
- Estar rexistrado/a como demandante de emprego.
- Ter uns ingresos máximos mensuais de 452 euros no caso dunha persoa adulta que viva soa e de 149 euros máis ao mes por cada persoa adicional, adulta ou menor, que conviva na unidade de convivencia ata un máximo de 1.015 euros ao mes. Os cálculos pódense facer sobre o ano anterior ao momento da solicitude, ou, para atender ás persoas que se viron afectadas pola crise do covid-19, calculando se os ingresos obtidos desde o inicio do ano actual ata o momento da súa petición estarían por baixo da cifra máxima para solicitalo.
- Cumprir cos límites do patrimonio establecidos. O máximo permitido é de tres veces a contía anual da prestación para cada un dos casos, restando posibles débedas que se teñan e sen ter en conta o valor da vivenda habitual.
Hai algunha excepción a estes requisitos?
Si. Contemplaranse circunstancias especiais para colectivos como as persoas vítimas de trata, explotación sexual ou violencia de xénero e outras que afectan á demanda de emprego.
Canto se percibirá en cada caso?
A renda garantida polo Ingreso Mínimo Vital é de 462 euros ao mes para unha persoa adulta que vive soa. Así, esta cifra vaise incrementando en 139 euros ao mes por cada persoa adicional, sexa esta adulta ou menor ata chegar aos 1.015 euros ao mes. Ademais, sumaranse 100 euros ao mes para as familias monoparentais.
Estes son os supostos máis habituais:
Cantidade percibida polo Ingreso Mínimo Vital
Como se cobrará o IMV e ata cando?
Esta renda cobrarase de maneira mensual en 12 pagos. Trátase dunha prestación indefinida, polo que se seguirá cobrando mentres dure a situación de falta de ingresos, aínda que a súa contía adaptarase no caso de aumento ou perda de ingresos laborais ou doutro tipo cos que non sexa compatible.
Cando e como se pode pedir?
A solicitude desta prestación poderá facerse desde o 15 de xuño a través da sede electrónica da Seguridade Social. A documentación poderá enviarse tamén por correo ordinario.
Solicitude Ingreso Mínimo Vital – 15 de xuño de 2020
Que documentación se debe presentar?
- DNI, libro de familia ou certificado de nacemento.
- Para acreditar a residencia legal en España: inscrición no rexistro central de estranxeiros, tarxeta de familiar de cidadán da UE ou autorización de residencia.
- Certificado de empadroamento.
- Para acreditar a existencia da unidade de convivencia: certificado de empadroamento ou libro de familia, certificado do rexistro civil ou inscrición no rexistro de parellas de feito.
